🐕狗狗跳蚤 可大可小！

跳蚤係外寄生於哺乳類動物嘅寄生蟲，有扁平嘅身軀同堅固嘅爪，可輕易粘附喺宿主嘅皮膚、頭髮、毛皮或羽毛上。

喺香港和暖潮濕嘅天氣之下，跳蚤全年都頗為活躍。跳蚤嘅繁殖速度驚人，每日可以產下20至40個卵，10隻雌性跳蚤可以喺一個月內繁殖近25萬個不同生命階段嘅跳蚤，發育完全嘅成年跳蚤就算幾個月唔進食都可以生存。

狗狗感染到跳蚤會搔癢、舔毛、啃咬被叮處，體質容易敏感嘅毛孩仲可能出現全身過敏反應，造成局部禿毛或紅腫，嚴重嘅仲會併發過敏性皮膚炎。跳蚤仲會攜帶多種疾病，更可引致嚴重貧血，最壞情況下可令狗狗致命。

預防勝於治療，主人緊記要定期幫狗狗驅蚤，亦都要保持環境乾淨，先可以有效杜絕跳蚤滋生。由於跳蚤係人犬可相互傳染，為咗人狗健康，絕對唔可以輕視驅蚤嘅重要性！